Posts

Showing posts from October, 2012

സമാധാനപ്പല്ലി

നവാസ്‌ അത്തോളി

(ആണ്ടുകള്‍ക്കപ്പുറത്തൊരു ബലിപെരുന്നാള്‍ദിനത്തില്‍സദ്ദാംഹുസൈ ന്‍തൂക്കിലേറ്റപ്പെട്ടപ്പോ ള്‍എഴുതിയ കവിത    ഈ ബലി പെരുന്നാള്‍ ദിനത്തില്‍ ...) സമാധാനപ്പല്ലി
ഇനി, അയാള്‍ നാക്ക്‌ നീട്ടുന്നത്
നമുക്ക്‌ നേരെയായിരിക്കും....

ഭൂലോകസമാധാനമാകെ-
താങ്ങിനിര്‍ത്തുന്നത്‌
താനാണെന്നമട്ടില്‍
ഒരു തെരഞ്ഞെടുപ്പ് നാണക്കേടിന്റെ
മേല്‍ക്കൂരയില്‍ കയറിനിന്ന്
ഈ ഭീകരന്‍
നാക്കുനീട്ടാന്‍ തുടങ്ങിയിട്ട്
നാളുകളേറെയായി.

നാണമില്ലായെന്ന്‍
നാണിക്കുവാന്‍ പോലുമാവാതെ
നാമിരിക്കുമ്പോള്‍
ഇവറ്റകള്‍ തലയ്ക്കുമുകളില്‍
നൃത്തമാടുക തന്നെ ചെയ്യും.

ചാണക്യസൂത്രങ്ങളറിയുന്നയീ-
പല്ലിയിന്നലെ,
നാവില്‍ കൊടിയ വിഷം പുരട്ടിയൊരു
സിംഹത്തിന്റെ മുറിവില്‍ തൊട്ടതിനെ-
കൊന്നുവത്രെ...!!


പക്ഷെ
കൊന്ന പാപവുംമാംസവും
തിന്നു തീര്‍ക്കാനാവാതെ
വലഞ്ഞുവത്രെ....
വലയുമത്രെ...

അല്ലെങ്കിലും
ഒരു പല്ലിക്ക്
ഒരു സിംഹത്തിനെയെങ്ങിനെ.....?

ഇവന്റെ കുലത്തില്‍
ഇവനെക്കാളെത്രയോ
ഉഗ്രരായിരുന്ന ദിനോസറുകള്‍
ഭൂമിയില്‍ മദിച്ചതും
തുടച്ചു,തുടച്ചു നീക്കപ്പെട്ടതും
ഇവനറിയാതിരിക്കുമോ....
ഇവനെയറിക്കാതിരിക്കുമോ......



അറിവ്‌

അറിയുക പിന്നെയുമറിയുകയീ വേവും നോവുകള്‍  നോവല്ല ....
ദിനരാത്രങ്ങളുരുകിയൊലിച്ചീ- കാലത്തിന്നള നിറയുമ്പോള്‍ നൂലായ് പിന്നെയുമെത്തുന്നു കരളു പിളര്‍ക്കും വേദനകള്‍
മെഴുതിരിപോലെയെരിയുന്നു ഞാന്‍ മനമുരുകുന്നു പാടുന്നു
ഓരോ പുലരിയുമെരിയും വേനല്‍ കടലായ്‌ മുന്നില്‍ നിറയുമ്പോള്‍ അണയുന്നിരവുകള്‍ മരുഭൂവാക്കാന്‍ ക്രൌര്യത തിന്നുതുടുത്ത പകല്‍
പ്രിയമൊരു പാട്ടിന്നോര്‍മകള്‍ പോലും പരതിയെടുക്കാന്‍ തന്നീടാതെ പിടിച്ചു വലിച്ചു ഞെരിക്കുകയാണെന്‍ ചേതനയെയൊരു  ചെന്നായ്‌കൂട്ടം
അറിയുക പിന്നെയുമറിയുകയീ അറിയും നോവുകള്‍  നോവല്ല .... മെഴുതിരിപോലെയെരിയുന്നു ഞാന്‍ മനമുരുകുന്നു പാടുന്നു

കറുത്ത വെളുപ്പ്

വെളുത്തൊരമമയ്ക്കും
കറുത്തൊരച്ചനും പിറന്ന
കറുത്ത നീയും പിന്നെ
വെളുത്ത ഞാനും
കറുപ്പൊഴികെ ഏതു വര്‍ണ്ണവും നിനക്ക്  പ്രിയപ്പെട്ടതായിരുന്നു
കാര്‍മുകില്‍ വര്‍ണ്ണനെ കുറിച്ചുള്ള വര്‍ണ്ണനകളിലൊന്നും നീ  തൃപ്തയായിരുന്നുമില്ല
കറുപ്പ് മാറാന്‍ പൊടിക്കൈകള്‍ തേടിയ ബാല്യം പരിഹാസച്ചിരിയില്‍ ഞങ്ങള്‍ വീണ്ടുമെത്രയാണ് കറുപ്പിച്ചത്........
ഒടുവില്‍ സോദരീ
സര്‍പ്പവിഷനീലിമയില്‍
നീ കറുപ്പ് വെടിഞ്ഞ്
വെളുപ്പണിഞ്ഞ്
വെളുത്ത വാനിലലിഞ്ഞെങ്കിലും
വെളുത്ത ഞങ്ങളീ
കറുത്ത മണ്ണില്‍
ഉള്ളം കറുത്തുമിന്നും
കനല് തിന്നുന്നു